ރާއްޖޭގެ ސްކޫލް މަދަރުސާތަކުގެ ކިޔަވާކުދިންނަށް ޚާއްޞަ ކުރައްވައިގެން އަންނައަހަރު މިނިސްޓްރީ އޮފް އެޑިއުކޭޝަނުން ފެއްޓެވުމަށް ހަމަޖައްސަވައިފައިވާ މަދަނީ ތަރުބިއްޔަތުގެ ޕްރޮގުރާމްގެ ލަފާދޭ ކޮމެޓީގެ ފުރަތަމަ ބައްދަލުވުން 3 ޑިސެމްބަރު 2008 ވީ ބުރާސްފަތި ދުވަހުގެ ހެނދުނު މިނިސްޓްރީ އޮފް އެޑިއުކޭޝަންގައި ބާއްވައިފިއެވެ.މިބައްދަލުވުމުގެ ރިޔާސަތު ބެލެހެއްޓެވީ މިނިސްޓަރ އޮފް އެޑިއުކޭޝަން އޮނަރަބަލް ޑރ މުސްޠަފާ ލުޠުފީއެވެ.

މިޕްރޮގްރާމަކީ ކޮބައިކަން ތައާރަފް ކޮށްދެއްވަމުން މިނިސްޓަރ ޑރ މުސްޠަފާ ލުޠުފީ ވިދާޅުވީ މަދަނީ ތަރުބިއްޔަތު ޕްރޮގުރާމްގައި ހިމެނެނީ ޙައްގުތަކާއި ޒިންމާތަކާއި ވަތަނުގެ އަހުލުވެރިއެއްގެ ހައިސިއްޔަތުން އަދާކުރަންޖެހޭ މަސްއޫލިއްޔަތު ފަދަކަންކަން ކަމުގައެވެ.އެހެންކަމުން މިބައިތަކަކީ ލައިފް ސްކިލް ޕްރޮގުރާމްތައް ފަދައިން ކޯކަރިކިޔުލަރ ހަރަކާތެއްގެ ގޮތުގައި ކުރިއަށްދާން ޖެހޭކަމެއްކަމަށް މިނިސްޓަ ވިދާޅުވިއެވެ.

މިޕްރޮގުރާމް ކުރިއަށްގެންދަވާނެ ގޮތާއިބެހޭގޮތުން ކޮމެޓީގެ މެންބަރުންގެ މެދުގައި ހިޔާލް ފާޅުކުރެއްވުމަށްފަހު އިސްކަންދެއްވާނޭ 8 ތީމެއް އަންނައަހަރަށް ފައިނަލް ކުރައްވަން ހަމަޖެހިފައިވަނީ ބެލެނިވެރިންނާއި ދަރިވަރުންނަށާއި މުދައްރިސުންގެ ޚިޔާލްވެސް ހޯއްދަވައިގެންކަމަށް މިނިސްޓަރ ވިދާޅުވިއެވެ.